بس صــــوتك...سيد منيرعطيه

لمّا بسمع بس صوتك
بنسى كل الدنيا واجي
بنسى إنّك
غيبتي ساعه عن ميعادي
واني حالف م الليله دي
ألتفت بعيوني عنّك
وامّا بسمع بس صوتك
بنسى حتى زعلي منِك
وانسى ان القلب قاللي
إنّه خاصمك
وانُه حالف لمّا تيجي
رح يسيبك قاعده واحدك
أصلي عارف لما تيجي
هوّ حتى رغم زعله
اللي رح يطلع يصالحك

قلبي كدّاب لمّا قاللي
إنُه خاصمك
دا يخاصمني عشان عيونك
ويصالحني عشان عيونك
بس لمّا يكون بدونك
يبقى خارج عن شعوره
يبقى حاسس ان دوره
ف الحياه كومبارس مسرح
يرفض الدور اللي يجرح
يشتمك يلعن غرامك
يلعن انّه ف لحظه مالك
وامّا يسمع بس صوتك
واللا يلمح طرف ضلّك
ينتفض جوايا عايز
لو يشُق الجلد يطلع
برّه منّي عشان يضُمك

مش بقولك ...
قلبي كدّاب لمّا قاللي
إنُه خاصمك ؟
ياللي من أوّل ما شوفتك
وانتي أغلى ما عندي ليّا
أغلى حتى من حياتي
إنتي حلم الماضي فيّا
وانتي تفسيرُه اللي آتي
يعني رغم جديد غرامنا
قلبي شايفك ذكرياتي
كل قصصي وحكاياتي
بس أوعي تغيبي تاني
عن ميعادي
واللا اقولك ...
غيبي خلّي الشوق يزيد
م النهارده خلاص يا روحي

عندي ليكي عقاب جديد
كل ثانيه غياب قُصادها
من كريز الشفّه سُكّر
والدقيقه .. يبقى اكتر
والزياده بحضن أكبر
يعصرك جوّه الوريد
هوّ ده عقابي الجديد
زيدي ف غيابك ياروحي
خلّي تبقى ليلتنا عيد
والهلال ح يهل لما
قلبي يسمع .. بس صوتك

سيد منيرعطيه
من ديوان (سكران حب)