............
أعيش العمر لو لحظه
قريب منّك
وأفتح ضلفتين قلبي
ف عز البرد وأضمك
وده لإنك ..
حكاية عشق سكناني
ووخداني ..
طريق مفتوح على الجنّه
وكل ما تبقي ويايا
بلاقي للحياه معنى
والاقي الحب يجمعنا
كيان واحد على جسدين
ولا عارفين
ولا شايفين
يادوب م الدنيا غير شوقنا
وطول م انا وانتي شئ واحد
ما يقدر شئ يفرّقنا
ولو تطرحنا أيامنا
هييجي غرامنا يجمعنا
ويزرع ألف شجرة نور
عشان لو لحظه توهنا بعيد
ضياها قوام يرجّعنا
ويفضل حلمنا آيه
بتتفسّر بميت معنى
ويتجمّع مدار ونجوم
وشمس وقبله للعاشقين
يدفّي الصحرا من أمشير
ويرمي الضي للتايهين
م انا وانتي النخيل ألوان
وشجرة تين
بتدّي عسلها للعايز
وطول م الحب شئ جايز
هيفضل قلبي كون مفتوح
وضحكة وش فجر صبوح
وروح .. بتطوف حواليكي
صباح ومساء
وتبعتلك رسايل شوق
على استحياء
ويفضل دق قلبي يقول
بحبك .. م الألف للياء
وبعشق كل شئ فيكي
سواء يا حبيبتي ف سكونك
سواء يا حبيبتي ف جنونك
ف ضحكه من ملاك وشّك
ف نظرة حُب ف عيونك
وطول م النبض ف وريدي
هعيش العمر مجنونك
واصونك .. من عيون الكل
واكونلك .. عز شمس الصيف
جناين ضل
ولما البرد فجأه يهل
هدفّيكي ف حنايا القلب
وعمري م ابتعد عنّك
م انا بيكي
وانا جنبك
وانا ليكي
وانا قلبك
وانا اللي يهون عليّا الكون
واعيش العمر لو لحظه
قريب منّك
سيد منيرعطيه
ليست هناك تعليقات:
إرسال تعليق