بيَّاع كلام ...خالد العطار

أيوة كَدَبت عليكي لمّا حبيتك
وخَلَفت لمّا وعدّتك بالغرام
كَدَبت لمّا أنا قلت ولّا كتبت
ولّا وَهَبت ..
وطلعت ف الآخر بيّاع كلام
وانتي أكتر واحدة عارفة اني كداب
وإن عينى في هواكي
ما يملاها إلا التراب
وان قلبي زي جسمى تمام
بيغير كل يوم ساعة
شبعتي كلام ؟
قلتي عني شبه راجل
ولا نص راجل
واتهمتينى بالوضاعة
بس نَكَرتى انى عندك بألف راجل
كان ناقص حتى
تتهميني بالرضاعة
ايوة رضاعة حنان ومحبة وهيام
وأعلنتي...
انك فرحتى ب بِوِش القفص
وشَوّهتي قلبي فِ قعر البضاعة
أشكرك...هوه ده مسك الختام؟؟؟؟
لكِ من قلبي اللّي باعك
وما بيعرف هواك مليون سلام
ولّا أقولّك ؟
مش هنقَضّيها سلامات
مانتي قلتي عن هوانا كان حب ...ومات
أهااااا ؟؟
يعني كان حب وعايش؟
يعنى كان له جسد وروح
مكانش كلام كدب وبايش
روحين في قلب بالظنون مجروح
يعني حبي جواكي لمستيه
واتحسستيه ومليتي صدرك بيه
يعني كلامي مكانش كدب
ومكنتش بيكي بتسلّى
كنت كاتبه بقلب
واللّي نبعه القلب
يعلا فى السما عمره ما يتدّلَّى
ماهو لو مكانش حب بجد
مكانش دخل قلبك واحساسك
ومكانش نبض الغرام
سابق الحمام
وجا يشغل بالهوى راسك
ولّا حبي مكانش على كدك ومقاسك ؟
ولّا احنا موش كد المقام ؟
طب لما احنا موش كد المقام
ليش النواح زى أفراخ الحمام ؟
حيرتيني يا بنت الروح ولب القلب
موش راح أقولك أنا مجروح
وتاه مني الدرب
بس أقولك آخر الكلام
الله يسامحك والسلام
خالد العطار