احلامنا...شاعر الغلابة ناصر على

في منامي .... شايف خطين
ولو أنه .... كان يوم حطين
والفارس .... راكب فرسين
وفـ ايده .... ماسك نصلين
بيحرر .... أرض فلسطين
وملايكه .... فارده الجناحين
صحاني .... ابني المسكين
ولساني .... بيقول سطرين
النجدة .... يا بنى آدمين
فـ رقابكم .... دم فلسطين
****
مسمومة .... العيشة يا ناس
مرسومة .... فـ سجارة وكاس
وادمر .... فينا الاحساس
وسكنا .... وسواس خناس
والتوهة .... ماسكلنا الفاس
معتوهة .... قافلة بترباس
وما دمنا .... عايشين تايهين
بنلملم .... نعمل قرشين
ونسينا .... لنسد الدين
النجدة .... يا بني آدمين
فـ رقابكم دم فلسطين
****
معلهشي .... بكتب خرابيط
سامحوني .... لو كنت عبيط
ساعدوني .... اتخطي الحيط
ودونى .... لبداية الخيط
تلاقوني .... ارمح قراريط
ما كفاية .... وبلاش تنطيط
ايه يعنى .... نبكيلنا يومين
على روحك .... يا احمد يا يس
ونسينا .... لنسد الدين
النجدة .... يا بني آدمين
فـ رقابكم دم فلسطين
****
ايامنا .... مش لاقيه العيد
والفقر .... مدلدل عناقيد
ومادمنا .... اسياد وعبيد
مش ممكن .... تطلع لنا ايد
والدبه .... مانعة الزغاريد
زغرودة .... وشايفها بعيد
مخنوقة .... مقسومة اتنين
ونسينا .... لنسد الدين
النجدة .... يا بني آدمين
فـ رقابكم دم فلسطين
****
احلامنا .... صبحت كوابيس
مرشوقة .... دبابيس دبابيس
والخلق .... شوية قراطيس
مبلولة .... هيموتوا فطيس
وعنينا .... شايفه الاباليس
ورضينا .... بقفل وترابيس
وقاسينا .... مـ المر سنين
ونسينا .... لنسد الدين
النجدة .... يا بني آدمين
فـ رقابكم دم فلسطين
===============
من ديوانى حلم الغلابة