أنا الكسبان ....من ديوان ..(سكران حب)..سيد منيرعطيه

لمّا دموعي بتهرب منّي
غصبن عنّي ف ثانيه تبان
أرجع طفل ومحتاج أمي
محتاج حُضن أحسه أمان
أجري وأدخل بين أحضانك
وكأني لقيت العنوان
أصلي عرفت خلاص الفوله
أرجع طفل ف سنته الأولى
وان كان حُضنك ليّا طفوله
أرجع طفل .. وانا الكسبان
أتشعبط على صدرك واحبي
وامسح دمع عيوني بإيدك
فجأه يزيد الدق ف قلبي
أنسى دموعي وأبقى حبيبك
أفتح قلبي واضمك ليّا

وأخبّيكي ف نن عينيّا
م انا معذور دي حبيبتي حوريه
وانا ف الأصل يا ناس إنسان
وان كان حُضنك ليّا طفوله
أرجع طفل .. وانا الكسبان
ياللي عيونك شمسي وضلّي
وخدودك تفاح ربّاني
قلبي شاوريلي عليكي وقاللي
ديّا ومش عايز شئ تاني
حسّيت إن البدر تجلّى
وان ضلام الأيام ولّى
قلبي اتوضا وسمّى وصلّى
ورماني ف أجمل بُستان
وان كان حُضنك ليّا طفوله
أرجع طفل .. وانا الكسبان
سيد منيرعطية