ضحكة چذابه...هدير الجواهري أم تقي

كل شي صبغ بيها والوان...

حتى الضحكة صارت چذابه...

ماكو شي بيچ يا دنيا حلو...

بس أوهام وغربة ورتابه...

كل شي مزيف يصبح عنوان...

والصدگ حيفه كله بعذابه...

اليحچي ويعيش بالصدگ...

الكل يصدر عنه ويسموه كآبه... 

والحيال كلها تصفگله ويسموه...

مرتب ومدبرها ويغني عتابه... 

مدري وين نروح من هالدنيا...

شلون دنيا ما تخلص هالطلابه...

لو نلبس أقنعة حتى نعيش...

لو نتحمل عضات هاي الذيابه...

ماكو مخلص بيها أبد ولا وفا...

شلون اتعلم اچذب وية الچذابه...

خلص ما يفيد بعد هالعمر الگضه...

وسفه ضاع العمر واحلى أبوابه... 

حتى محبوبي راح وية الزلگ...

وگلبي تعلم على البعد وغيابه...

بلا كلمة يودعني بيها ولا مكتوب... 

وشفت الغدر شلون تكون انيابه...

تعلمت ما أسأل عن اليرحون... 

ولا حتى أسأل شنهو أسبابه...

الحجج ودروب الزغل هواي.... 

واليحب دوم يسأل عن احبابه...

ولو چنت اهمك بشي ما چان...

رحت بلا مكتوب ولا سطر كتابه...

وتدري گلبي وفي وياك دوم...

وما درت بال الاذيتي لو عتابه... 

حتى الوداع يكون بكلمات حلوة...

هذا هو الحب والكلام ورد جوابه...

الحب حلو من يكون مبني عالعهود...

وحتى الفراگ رغم الألم والسحابه...

بس أحسن مما نمشي وره وهم...

ولا نبقى على أمل چذاب وسرابه...

ونصيحة مني لا تبچي عالباعك...

ولا تستغرب بهالدنيا ماكو أي غرابه...

عيشها شلون ما چان ولا تهتم...

لليروح واليجي وتسأل أسبابه...

راح يلگه بدل العذر مليون عذر...

ومحد يخسر غيرك ناسه واحبابه...

..............................................هدير