احچيلي الصدگ...هدير الجواهري أم تقي

احچيلي يا بعد الروح ولا تضم...

أريد اتباصر وياك وتحچيلي الصدگ...

هم عينك تصد للغير ونبضك يرف... 

لو گلبك بس الي وحدي يدگ...

هم گلبك ينعصر مثل گلبي...

كل ما اشوفك ووراها نفترگ... 

وحيلي ينهد وره كل شوفه...

مثل حمل النخلة ويه العثگ...

لا تگدر تذب حملها وترتاح... 

ولا يساعدها واحد من الخلگ...

وطعم العسل اضوگه بنظرتك...

وحصرم وعلگم فرگتك واحترگ...

وكل يوم أگول اليوم يجي واشوفه...

وانذر شموع عشرة لو تجي تعتلگ... 

وظل مناطر الدرب المنه تجي...

ولا تجي والعمر يمشي وينسرگ... 

لشوكت أظل متاني جيتك حبيبي...

وگلبي بذكرك يتخربط وينطرگ...

ومن تطول الغيبة وما اسمع اخبارك...

تضيگ الوسعه بعيني وحيل اختنگ...

وچفوفك لو تلاگي چفوفي بمحنة... 

انذر ذبيحة واوزع شموع وعلگ...

واروح متعنية للعباس أوفي النذر...

وغيرك ما عندي ولف ولا عشگ...

.............................................هدير