سياده المواطن ..بقلم أ.حسام

* سيادة المواطن *

سيادة المواطن
لأنك مواطن
هتفضل تعاني 
في ظاهر وباطن

ولو مرة تشكي
يقولو دا خان
ولو مرة تحكي
يقولو جبان

سيادة المواطن
كلامنا صحيح
بيشرح همومنا
بعامي وفصيح

ولكن سيادته
ودا بحكم عادته
بيحتاج تملي
معاه ترجمان

سيادة المواطن

أنا عشت عمري
أهاتي واقول
بينداس تملي
ولاد الأصول

ونركع لظالم
كتير المظالم
وإمتى قولولي
الحقيقة تبان

سيادة المواطن

أنا إبن عمي
رهن نص داره
عشان بس يقدر
يربي عياله

واخويا مهاجر
وواخد قراره
بإنه ما يرجع
وساق في الجنان

وأقوله هتغرق
يقولي وماله
أنا فضلت عايش
غريق من زمان!

سيادة المواطن

انا لسه عايش
في وهم الأمان
واقول بكره تفرج
وخيرها يبان

فحاول بربك
تشوف نور في دربك
عشان اقدر افتح
بقيت البيبان

سيادة المواطن
بعاني المرار
وعايش في نار
وبشرب هوان

سيادة المواطن
فهمت الحكاية؟
ولا انت محتاجني
أشرح كمااااااااان

سيادة المواطن..
* حسام