ما كانش اتفاقنا ...سيد منيرعطيه ..إلى روح الرائد / صلاح جاب الله

ما كانش اتفاقنا ..
يكون النهارده سلامنا الأخير
وأضرب تحيّه لنسر الكتاف
بدون حتى ما اعرف
خطاوي المصير
يا طعم البراءه يا صاحبي الكبير
ما كانش اتفقنا تسافر وتحلف
ما ترجعش تاني
تسيب المحاضر ف ضلفة دولابك
بإمضة إيديك
وكرسي بينده يا صاحبي عليك
ومكتب يعاني
يا رائد ورائد ف معنى الصداقه
ما كانش اتفاقنا تسلّم حياتك
وم الدنيا تاخد لواحدك براءه
ما كانش اتفاقنا ألاقي الملايكه
بتيجي تفاجئني بكتفا سلاح
وأسأل يرد الحمام اللي طاير
يقوللي تحيّه لصاحبك صلاح
تسيبني ف ضيق الحدود اللي عندي
وتاخد لواحدك طريق البراح
ما كانش اتفاقنا
تسافر لواحدك ويوسف بيحبي
عيونه البريئه بتسأل يا صاحبي
وعاجزه الإجابه ف لسان الكبار
يا إبن النخيل والشجر والسنابل
وضحكه ف منيا القمح الخَضار
تجلجل وصوتها بيصبح غناوي
بيرقص عليها الجميع ف المطار
ما كانش اتفاقنا تسلّم وترحل
وترمي ف عيون الجميع الدموع
يا راحل ف سكّه ما تعرف رجوع
أنا لسّه واقف ورافع دراعي
أأدي التحيّه لصاحبي الحبيب
أنا لسّه واقف ومستني تيجي
وتشرب معايا الشاي بالحليب
ح تيجي يا صاحبي كما العاده واللا
ح تخلف ميعاد الصباح اللي بنّا
يا سايبنا دنيا وراحل لجنّه
ح تفضل ف يوسف عشان امتدادك
وتفضل يا صاحبي كعادتك ما بنّا
برغم ان سفرك يا صاحبي لواحدك
ما كانش اتفاقنا
ما كانش اتفاقنا
سيد منيرعطيه
من ديوان ((فتافيت حروف))