الغربه إيه ؟
لفيت كتير جوّه المدن
وانا فوق كتافي دا السؤال
وسنين طوال
وانا ماشي مش لاقي الجواب
شايل سؤال يشبه جبل
وبادُق بيه على كل باب
ولحد ما ...
شافني هناك راجل عجوز
طبطب كتافي وابتسم
قال يا ولد ...
لسّاك صُغيّر ع السؤال
لكن ح اجاوبك باختصار
للغربه شئ ...
يشبه تروس مكن الجحيم
تغرز سنانها ف جتتي
وتبُخ نار
الغربه مش غربة مكان
ولا حتى دار
ولا حتى ساعه تحس
فيها بانكسار
الغربه غربة ذات
وذات مش لاقيه ذات
ف تعيش كأنك ليل
ما يعرفش النهار
الغربه تبقى مش لاقيك
ولا حتى فيك
أو صوره باهته
ف المرايه تبص لك
وتكلمك
ف ترد وانت ..
حتى إسمك مستعار
الغربه إحساس
صعب إنك توصفه
زلزال مفاجئ
ينتهي بالإنهيار
وكأنك النجمه الوحيده ف السما
التايهه مش لاقيه المدار
خلّص كلامه واختفى
من قبل ما انطق بالحروف
حسّيت بخوف
لكن عرفت شئ غريب
إن العجوز ...
كان ف الحقيقه هوّ انا
ليست هناك تعليقات:
إرسال تعليق