مفتتح
نشرة أخبار ف التليفزيون
مليانه صور
بتذيع تفاصيل الموت ياوطن
البحر كفن
والبر كفن
والجو رياح بتصب عفن
الموت للميّت طعم حياه
طول م الأحياء
ف قلوبها عطن
قصيده
واقف قصادي ف المرايه باكلمه
ولقاني غضبان م البشر
شكل الولاد الغرقانين
بيلين معاه قلب الحجر
سوريا الجريحه بتحتضر
وولادها موتى ف الطريق
وعلى الحدود
الهربانين من صوت بارود
ف البحر وجبه للسمك
أو محدوفين
ف بلاد غريبه ومقتولين
سوريا الشموخ صبحت وجع
وعلامه سودا ف الجبين
واقف قصادي ف المرايه باكلمه
ولقاني باشتم كل شئ
كل الفصايل والجيوش
كل اللئام
كل اللي ماشي ف القطيع
على كل ماسك ف اللجام
وبدأت أشتم كل حكام العرب
ف لقيته باصص ناحيتي
بالغيظ وبادئ ف الكلام
قال هُس واوعي تزيد كلام
مش م البطوله
تسب موتى ع الملأ
حكامنا موتى من زمن
ولكل ميّت إحترام
ف ارفع دراعك بالسلام
دا الضرب ف الحكام
حرام
سيد منيرعطيه
ليست هناك تعليقات:
إرسال تعليق