وبعدهالك يا آسية ,,,,,,,,, زياد الاسكندراني

 

وبعدهالك يا آسيه
يا هموم
يا زمان
يا أيام .. مش هنيّه ..

يا ميل يا ويل
يا بيبان
يا شبابيك
مقفولين عليّا ..

وبعدهالك يا لياليّه
يا شكوى
يا وحدة
يا أربع حيطان
حواليّه ..

يا دمعتين
رايحين ..
يا دمعتين
جايين ..
صاحين .. نايمين
متشعبطين ف عينيّا ..

وبعدهالك
يا ورق متلخبط
يا قلم ع السطور
بيشخبط
سهران بيخبط
مقهور مكسور
ف إيديا ..

وبعدهالك
يا دنيا يا حياه
يا مليون آه
يا وعد
يا مقسوم ليا ..

بعدهالك
بعدهالك
بعدهالك
يا كل الهموم ..
يا كل الآسيه ..

مهما خنقتي
الأمل جوايا
مش ح يموت ..

ولا ح تموت
جوايا الامنية ..

ولسه بعد بعدهالك
بعد ..

ولسه بعد الوقت
وقت ..

ولسه ف الوقت
وقت ..

ولو النهاره وقتك
بكرة وقتي ..

ومسيرها
تضحك ليا ...
=============