من شوفتهم ما اشبع...الشاعرة/هدير الجواهري أم تقي

تدري يا گلب من شوفتهم ما اشبع...
وبشبگة من عطرهم اتعطر...
تگولي انساهم شنسى منهم...
وآني غيرهم ما أگدر اتذكر...
شادهين البال وعمري بده بيهم...
ويا عمر أريده وآني لملگاهم اتحضر...
وياهم أحلى أيامي گضيتها...
وهسة على ذيچ الايام اتحسر...
تعالي بطيف ومر يمي خليني...
شوية بخيالك اشبع شوف واتنطر...
كل ليلة انام بيها اگول راح اليوم...
يجي يمي ووياه اتفاكه واسهر...
يلشوفتك عيد وفرگاك عاشور...
خليك شوية فد ساعة تأخر...
أجل مشوارك وخلينا نسولف...
لسوالفك مشتاقة يا حلو المعشر...
شحلات السوالف وياك وما تخلص...
بضحكتك تنجلي همومي وازغر...
وياك چني بت العشرين وانت...
أول حب بحياتها وبشوفتك اتعثر...
ارجعلي ورجع أيامي الحلوة...
ليش گلبك وياي صخر مرمر...
وين راح الحنان وذاك الطيب...
ارجوك حبيبي عني لا تتغير...
أموت إذا ما سمعت منك صوت...
وبدونك بالحسرات يگضي العمر...
شگد چنت اتخوف من الناس...
بس وياك اسولف وما اتحذر...
گاعده انطرك وبس تجي يطش...
بديرتنا عطر المحنة والعنبر...
وتدري بگلبي ملچوم هواي بالدنيا...
لا تزيد لچماتي وتخليها وحدة أكثر...
حاچيني وذبها على الباري وحده...
ما يعلم المخفي إلا راعي المحشر...
..................................................هدير