وقالولى انسيه ..بقلم أ.حسام

* وقالولي إنسيه *

وقالولي إنسيه..
واوعي تحبيه
وسبيه يتعذب 
لو حساس

وهيجي ف يوم
ويقول مظلوم
وبحبك جداً
وبإخلاص

وقالولي كمان
سيبك منه
محتاج يتأدب
ولو انه
في الحب ربايته
ما ليها أساس

معقوله يا ناس؟!!

وقالولي كتييير
وعادولي كتييييير
وحكولي حكاوي
غريبه عنه
وقالولي كتيييير
إنه وإنه
غدااار
ويشيب شعر الراس

بالذمة يا نااااس؟!!

بقى دا اسمو كلام
معقول عيشني
في الأوهام
معقول يرميني
ف نار حبه
والآخر أسهر أنا...
وينام؟!
طيب يا حساااااام!

وقالولي انسيه
واشويه واقليه
على نار هاديه
قلبه دا حصاله
المتوحش

واسألي على كدا
فاديه وناديه
وسهير وتهاني
وأم الخير
ما في واحده
ف حبه
شافت خير

دايماً مغرور
ولا يعرف غير
انه يبهدل
ف قلوب الناس
واسألي على كدا
إلهام وإيناس

معقوله يا نااااس!!؟

وقالولي الناس..
طب خدي دي كمان
معروف دا بإنه ف حبه جعان
لا بيشبع يوم
ولا يحمد يوم
مع انه بخيييل
صدمان كحيان

ويجيب للي تحبه الكافيه
ويقولها عاشقك بالعافيه
النار في مشاعره
ماهيش خافيه
ولا عمره ف يوم
هيكون حساس

بالذمة يا نااااس؟!!

كفايه ياناس
أنا أصلي نويت
أبعد عنه
والعب بمشاعره
وأجنه
ونويت أسقيه
من نفس الكاس

لكن فجأه
هاتف جاني
من عز منامي
وصحاني

بصيت حواليا عشان افهم
أتاريه كان حلم سئيل وخلاص

وعرفت ف ثانيه ان حبيبي
لسه حبيبي

طب أعمل إيه؟
ودا كله عشان
حاسدني عليه

كلمت حبيبي
عشان اقوله
اتاريه عايش
نفس الإحساس

وبكل جمال وحنان قالي :
سيبك من شغل الترللي
وقالولي وقالو ومين قالي
دا كلام الناس
وسواس خناس
سيبك من كل كلام الناس
دا انا عاشقك جدا وبإخلاص

فارقونا يا نااااااااااااس
*حسام