بكل لحظة وياي...

تدري أنت بكل لحظة تمشي وياي...
وصوتك يتراوالي يمي مسموع...
وأكثر من مرة گتلك مشتاقتلك...
وانت تراوغ وتغير الموضوع...
وتدري شكد أحبك واتمنى اشوفك...
أگابلك أريد وما أفارگك ولا اسبوع...
وهسة جاي تعتب وتگول ما تسألين...
حبك بگلبي ضرب وقسمة ومجموع...
والطرح ما اذكره أبد تدري ليش...
لأن أنت تسري بدمي ووياي مصنوع...
والزاد نسيته من يوم العرفتك...
ومن اصيح بسمك انسى الجوع...
وسط گلبي مكانك كلش چبير...
ماخذ كل المكان وكل الربوع...
وانت تدري من عرفك بده عمري...
ليش چا تنسه فراگك والدموع...
عيوني تعمه اذا ما افكر بيك...
وشريان الگلب باللهفة مگطوع...
وادري صعبة شوفتك وهذا قدر...
من اول ما عرفتك وانت ممنوع...
وادور عليك من لهفة گلبي...
بين الوجوه وبكل الشوارع والفروع...
كافي فراگ وعتب وقسوة ما أگدر...
جربت وياي الجفا من كل نوع...
وآني متحمل وأكابر أگول بلكت...
يخابر اليوم ويگولي گلبي مليوع...
وانتظر كلمة كل يوم واشوفك...
ما مهتم بيه ولا يمك الموضوع...
وآني اتمنى احچي لكل الناس عنك...
اتنومس بيك وراسي بيك مرفوع...
وتدري عمري ما همني احد...
ولا أحب اكون بأي يوم متبوع...
بس وياك كل شي مختلف حبيبي...
وما عندي غاية وياك ولا مشروع...
كل غايتي أنت وبس وما اريد غيرك...
لو جابولي ذهب والماس من كل نوع...
.................................................هدير