الحصاد ..بقلم أ.رضا ابو الغيط

* الحصاد *
لما اتغير عُمر العود
اللى زرعته ف قلب الغيط
عودنا الأخضر أصبح مارد
بعد ما كان قبلها مولود
لما لمحته وشفته فرحت
وانخضيت...... لما عرفت
ان السن اتقدم بيه
شفت الدنيا بحالها عليه
اللى مشمر ديل جلبيته
واللى مدارى فاسه وراه
واللى مجهز مخزن بيته
عودى الأخضر
قَبر بطونا بتستناه
عودى الأخضر
اللى منور
غيط الحب بكل النور
دارى عليهم دمع عينيه
يا ما سهرت العمر أرويه
كنت بشوف العود يتمخطر
أفرح جدا وأجرى عليه
وأخده ف حضنى زى وليدى
يا ما سَندته وخفت عليه
جدر العود الساكن قلبى
رضع الحب وشرب الود
أصل العود كان مروى سُكات
مروى بكل مرار الصبر
ف زمن الصمت
زمن الصمت ولى وفا ت
لما السن إتقدم بيه
صنعوا لعودى ألف تابوت
آدى المنجل لامح طِيفه
قرب منه رافع سيفه
حالف انه اليوم يأذيه
حالف ياخد روحه وروحى
حالف تنزف فيا جروحى
عود الزرع الأخضر مات
لما ف يوم اتقدم سنه
وفقد الذات
والدراسه بتنهش فيه
عودى الأخضر
اللى أنا عشت العمر أداديه
لما السن اتقدم بيه
ف الدراسه بإيدى أرميه
يومها أنا خُفت
لكنى عرفت
انى مصيرى زى العود
لازم يوم الموت يجنيه

كلمات / رضا أبو الغيط