مش عارف اكتب ولا حرف ..بقلم أ.رضا ابو الغيط

مش عارف اكتب
ولا حرف
والكلمه.. لساها عنيده
مش لاقي الخيط
ولا حتي الطرف
ولاحاسس طعم التنهيده
وبعيده ...حروف العاميه
مرميه ..عن قصد ف بير
وضمير.... الكلمه العاميه
بقي حاله............ خطير
بيطير..... ويفوت البنيه
ويا العصافير
مع انه... عارف كالعاده
أفكاري .....دايما ولاده
لقصيده......... جديده
مش عارف
اكتب .......ولا حرف
والكلمه ..لساها عنيده
مع اني ...متعود دايما
مع دقة ساعه نص الليل
احمل فوق كفي المتحني
أحلاها قصيده
واستني الناس اللي تهني
والوتر السهران ريح مني
يخطفها ....ويقولي أغني
واسمع لقلوب السميعه
بتقول الله
للحرف الشاعر بأوجاعها
اللي ما راضيه تخف
ودموعها
السايله علي خدودها
مش راضيه تجف
وألف
حوالين بيت المتعافي
من جرح قديم
وأحايل فيه
يمكن يتنازل ويوافق
من تاني أبنيه
ويكون لي أساس
لبوادر طرح الاحساس
ف قصيده جدىده

********************
رضا ابو الغيط