خوفي وأسبابه ...هدير الجواهري أم تقي

أخافن أصفن بيوم وحدي...

واتمرّد على الوحدة والرتابه...

واخافن أفكّر بيك وتفضحني...

عيوني اللي صافنة بغرابه...

تخاف تگول تعلّقت بيك...

ويجيها الليل وتدگ عتابه... 

وتخاف ترجع تصدگ بالحب...

وما بيها حيل تحمل عذابه...

وألف سؤال يجي دوم ببالي...

واطرده والعن الحب وسرابه...

شردت وما واجهت الحقيقة...

لأن أدري بدروب الحب الچذّابه...

وأي سؤال تسأل ما اجاوب...

لأن الصدگ ما عندي جوابه...

أحاور واراوغ والف وادور...

وارجع بنفس ذيچ الطلابه...

ما أريد اوگع بالحب أبد...

لأن ادري بالحب واحبابه...

كله سهر وهموم وتعب...

وارجع ادگ بنفس الربابه...

ما عندي حيل أتحمل بعد...

ولا دموع تتنطّر يوم غيابه...

ولا گلب يتحمل آهات ووجع... 

بعد ما وگع بين كومة ذيابه... 

بعدني ما نسيت أيامي ذيچ...

ولا دموعي الضاعت بين الگرابه...

وظليت وحدي أداوي جروحي...

وهسة جاي تگولي مغرم صبابه...

شلون تريدني اجاريك وآني...

بالحب كافرة وبعد مرتابه...

ما أريد اتقرّب من ناره بيوم...

وانچوي وأصلي كل يوم بمحرابه...

خليني من بعيد أترقب واباوع... 

بلكت يجي يوم البس ثيابه...

واترك خوفي واقترب ليك...

وما أحسب للخوف حسابه...

يمكن يجي هذا اليوم ويمكن لا...

إذا تگدر تتحمل ظنوني وضبابه...

بكيفك انت تبعد لو تبقى قريب...

بعد ما حچيتلك خوفي واسبابه...

................................................هدير