يا آمنه..بقلم أ.رضا ابو الغيط

يا آمنه
********_
هوانتي ليه مش مؤمنه
بكل المبادئ والقيم
وتملي ليه مطمنه
ان النهايه بدون ندم ؟؟؟ !!!!
يا آمنه
المكر مالي الأكمنه
وانتي اتخلقتي من العدم
الشمس بكره مروحه
والرحرحه راح تنتهي
واللي معشم ف الزمن
بكره أكيد راح ينصدم
الزرع الأخضر ف الغيطان
أصبح حطب
حتي الأمان فوق الحيطان
شايفه انصلب
والصولجان
السوس بينخر جتته
قومي اسأليه .
فين سكته ؟
.ايه سكته ؟
وموقفه زي الصنم ؟
يا آمنه..... أمرك عجب
لساكي غاويه ترقصي
فوق مسرحك
رغم التعب
لساكي غاويه تفرحي
كل اللي حاول يجرحك
ولمطرحك
سامع شكاوي
كل المفاصل والقدم
يا آمنه
لساكي غاويه ليه طرب ؟
والدم ف عروقك هرب
لما ف يوم اتفرفطت
سنوات برأتك ف الهرم
يا آمنه
لو حابه تبقي مؤمنه
انوى الزياره... للحرم
واترحمي.
علي كل عشاق ضحكتك
علي كل عشاق خطوتك
اترحمي
علي كل مشتاق انعدم

************************
رضا ابو الغيط