عيشي الحياه......قصيدة/عاميه
...............
مين فينا خان العهد ؟
مين اللي بات حيران ؟
مين فينا قلبه اتهد
من دمعة الأحزان ؟
دنا كنت اهد السد
تبنيلي سد كمان
أبكي على الأشواق
واللا على قلبي
كان الغرام ذنبي
ما لقتش ليه غُفران !
قلبي اللي بالأشواق
أمن وقال رح اعيش
وف جنّة العُشّاق
على بابها كان درويش
وانتي اللي ما رحمتيه
م الجنّه وطردتيه
برخيص قوي بعتيه
والشوق كأنه ما كان
مين فينا خان العهد ؟
مين اللي بات حيران ؟
يا جرح جوّه الروح
بتإن من ألمي
القلب بات مدبوح
والنزف من دمّي
صوت الألم مكتوم
والدق متفرفط
يا ضحكه بتعيّط
دمعك صبح بركان
مين فينا خان العهد ؟
مين اللي بات حيران ؟
أنا كُنت عز الليل
شمعه تنورلك
أمشي ف طريق الويل
وارضى عشان خاطرك
أعزف بناي الشوق
أغنيه بحروفك
أحميكي من خوفك
لكن .. غرامي هان
مين فينا خان العهد ؟
مين اللي بات حيران ؟
عيشي الحياه وانتي
فرحانه بعذابي
م انا لسّه يا حبيبتي
إسمك على كتابي
عمري من الأشواق
ما حاولت يوم أبعد
وان قولت يوم أعند
قلبي بيبقى جبان
أبكي على الأشواق
والا على قلبي
كان الغرام ذنبي
ما لقتش ليه غُفران !
مين فينا خان العهد ؟
مين اللي بات حيران ؟
سيد منيرعطيه
ليست هناك تعليقات:
إرسال تعليق