لمّا ياخدني الصمت لحضنك
واشعر إنِّك أجمل عيد
لمّا اتألّم وانتي بعيد
واحلف إن العالم كُلّه
يصبح ضلمه لما تغيبي
لمّا أدوب لحظة ما تنادي
تقولي حبيبي
يبقى أكيد جوايا مشاعر
أكبر من كل الأوصاف
لمّا النسمه تعدّي واخاف
أحسن تجرح خُصلة شعرك
وامّا أحس بروحي ف حضنك
بين أزهار جنّة رضوان
واّما تغيبي يجيلي جنان
يبقى أكيد جوايا مشاعر
أكبر م العُشّّاق بزمان
يبقى بشوفك عمري الفايت
والحاضر والأتي كمان
يبقى حياتي أكيد على كفّك
وانا فعلا مخلوق من عِشقك
أتجنن من ورد خدودك
أو عودك وجمال تسريحتك
وتاكلني الغيره بأنيابها
من عطرك ومراود كُحلك
يبقى أكيد جوايا مشاعر
جيّه بطعم وشكل جديد
أبقى العاشق بالتحديد
يبقى ازاي بتغيبي وعايزه
قلبي يغني
واللا يقول لو حتى نشيد
لا يا حبيبتي
دنا قلبي المعجون تغريد
يصبح لما تغيبي دموع
يصبح طفل رضيع ويتيم
يبكي عشان ميّت م الجوع
قلبي اللي ما أعلنش خضوع
أعلن كل ولائه لحضنك
وانتي اهو فات ليلتين ولا همّك
إنه يموت ف الحُب شهيد
يبقى ازاي ف غيابك ح اقدر
أظهر حتى بشكل جديد ؟
هوّ يتيم القلب يا قلبي
ممكن لحظهّ يحس بعيد ؟
فين العيد ؟
سيد منير عطيه
من ديوان ((كل الحروف انتي))
ليست هناك تعليقات:
إرسال تعليق