أنا الفاتح ..
ببان القلب ع الشارع
وسامع زقزقات الطير
أنا الزارع شجر أشواق
وراسم ع الشجر عصافير
أنا اللي ف طيبتي متكعبل
ومن خيبتي ..
وقعت ف بير
ما فيش تفسير
سوى إنّي ضعيف الشوف
وساذج لمّا حبّيتك
ما شوفتش قد إيه غدرك
ولا المجاريح قصاد بيتك
أنا اللي ف حضني خبّيتك
وبافتح حضني ما التقيكيش
ف لحظه العقل تاه منّي
على بابك بقيت درويش
لقيت شجري الجميل محروق
طيوري ..
منزوعين الريش
أكيد فعلا ما تستاهليش
غرامي اللي ابتدا عندك
ولا عمري اللي كان ليكي
ما تستاهليش دموع عيني
ولا قلبي اللي داب فيكي
دا غدر الدنيا ف عينيكي
وقلبي لواحده كان أعمى
أنا المدبوح على إيديكي
وقلبك حتى ما سمّى
يا غاويه الزحمه واللمّه
عشان تتباهي بالعُشّاق
ما تستهليش تعب قلبي
وانا بازرع شجر أشواق
دا لولا مكارم الأخلاق
لقولت كتير
وعيدت كتير
وفسّرت الكلام تفسير
بدون ما استر معانيكي
يا غاويه الزحمه خلّيكي
ف بحر الغدر سبّاحه
ومرتاحه
وانا رح اقولها بصراحه
ف لحظة ما انتهيت منِّك
بدأت أعيش
ما تستاهليش
من ديوان (تــوكيــل أحــــزان)
ليست هناك تعليقات:
إرسال تعليق