باستغربك ..
إزاي كلامي بيبعدك
وانا كل حرف
وكل نقطه
وكل سطر
بيرشّوا فوق الورقه عطر
علشان حروف إسمك تكون
متزيّنه ومتعطّره
وحروفي زي المسطره
ماشيه الطريق المستقيم
لا الشِعر كان شيطان رجيم
ولا كان بيخرج ع الأدب
طب ليه بتقري اللي انكتب
وبتقطعيه وبتهربي
مع إنُّه عنوان للعفاف
ويخاف عليكي من الهوا
ويخاف كمان ليزعّلك
باستغربك
لو أي واحده مطرحك
رح تملا أباريق م الحروف
وترشّها على أرض بور
تطرح شجر
تطرح نخيل
تطرح زهور
تطرح جناين للغرام
حواليها أنواع الطيور
وتزيد وتطلع للسما
تزرع ف ليل العتمه نور
وتجيب من الشمس البذور
تبدرها فوق شط الهوى
الموج يسلّم للغرام
ويخاف يثور
ف ازاي هواكي عليه يجور
وبتبعتي الإعصار هلاك
وازاي أكون شايفِك ملاك
وتشوفي دايما دُنيتي
دُنية شيطان
الحب عمره ما كان جبان
ولا كان وجع
ولا كان عذاب
وان كنتي عاشقه الإغتراب
ف انا قلبي عاشق للوصال
وما زال .. بدقُّه بيعشقك
لكن ف عز ما باعشقك
باستغربك
سيد منيرعطيه
من ديوان (باستغربك)
------------
كتبت انا....
ازاي تقول باستغربك وانا كل حرف في قصتي اعتاد هواك؟!!
خد من غرامك الف اهه والف يااااه..وبطهر احساسك يا عمري صار ملاك!!
ازاي ؟!!
عاوزني اقف قصادك الريح واعافر وانا عارفه ان هواك هلاك؟!!
ومنين اجيب للقلب طااااقه تثبته جوه الضلوع لو راح معاك؟!!
مش بس كنت تفطمه قبل الهوى؟!.. علشان ينول الود ويوافق رضاك؟!!
مش معنى اني جريت بعييييد وجبنت.. اني زهدت فيك؟!!
ساعات كتييير بنقولها لا بعلو صوتنا وكل صرخة لا بتشد في خطاك..
افهم بقة..؟ترجم ولو مرة العناد واحسبها صح...القلب لو غلبه الهوى وقدر عليه يقفل بيبان الشوق اوام وعمره ما يحود هناك...
وعشان ما تفهمش الحروف غلط النوبة دي..راح افك شفرة عند قلب تعب معاك..
وهاقولها بصريح العبارة..ابعد بعيييد عن سكتي وبعزم قوة قلبك اجري هناااك حبيبي..
بس ابقة هدى الخطوة لحظة والتفت... هتلاقي قلبي بلهفته طااااير. وراك...
عبير الصلاحي
ليست هناك تعليقات:
إرسال تعليق