ورا عنوانكِ المذكور ف بطاقتكِ
شوارع حاضنة ف شوارع
وناس زحمة
حارات واقفة ع الناصية
مونسة إيدها بسيجارة
بتتمايع
و ندا بياع
خوف م الرزق يتوزع
وده شاري
وده بيتباع
وده بيبلع
وكام عيل
بيتزحموا علي الكورة
وكام بنوتة تتحنجل
وتتغزل ف بنورة
وعجوز محنية بتسلم علي الأسفلت
ف واحد مد
شد الإيد وقام الضهر
ومال علي الكف
يطبع منه كام نسخة
بريحة الشهد
وشيء ممتد
بيشبك اي حد بحد
و يربط كل ده بيكي
بيرسمني
بضباب اللهفة
في عنيكي
أزق بكتفي
و أحجزلي يا دوب أنقاض
ترديني بزقة ف صدري
تقوليلي
كل شيء بميعاد
كفاية يا أمي
حبيني
شرقت بعاد
أدور وشي
سارحة عنيا
رقمي الكام
أنعكش رصة الأرقام
مفيش رقمي
ومليش عنوان
وردك كان عليا غريب
جوبتيني
مفيش ترتيب
إحمد ربنا إنك
رقم قومي
ليست هناك تعليقات:
إرسال تعليق