الفكره مش حابه الورق
ولا راضيه تخرج م القلم
والحرف شاعر بالقلق
ساعة ما شاف اللي انظلم
لحظة هياج كل الحروف
فوق السطور ف الكراسات
لحظة ما قال صوت البارود
ان الضمير الحي ......مات
لحظة سكات كل البشر
علي قلب كان زى الحجر
فارد قلوعه وسطوته
علي فرع أخضر م الشجر
بالمختصر كده ..والمفيد
الفكره مش حابه... العبيد
ولا حابه تسجد للصنم
ولا حابه تمثال من حديد
الفكره... لجل ما تتولد
أو تتوجد ....كده م جديد
يلزمها عقل..... .وأفئده
ومساحه كافيه ف الوريد
محتاجه إيد
تقدر تطبطب ع العباد
لحظة هجوم سرب الجراد
علي حلم طارح ف الغيطان
انسان أمين عمره ماخان
انسان شجاع عمره ما باع
نبت الضمير جوه المزاد
الفكره ...لجل ما تتولد
أو تتوجد ..كده من جديد
محتاجه إيد
مرفوعه دايما للسما
متوسمه ...ف رب العباد
مش إيد .تطاطي للبشر
من غير ميعاد
علشان ما يرمي ف كفها
حبة فتات
ويذل دايما .....نفسها
ويحسها
تعلن . مبادئ كفرها
وإن الضمير الحي مات
************************
ليست هناك تعليقات:
إرسال تعليق