وكالعاده ...
معايا الهم بزياده
وكل ما احاول
اتصالح مع الدنيا
تطبطب حبه .
وتدمع
وترجع تانى
ترزعنى جوزين اقلام
وتشرب قهوتى ساده ...
كالعاده.....
( القصيده..)
للبيع لداعى السفر
عرض سارى لفتره واحده
لو هاتلحق تبقى فايز
احنا بنبيع النهارده
شيء خيالى
ان كنت عايز
مين يقرب
مين هايسمع
مين يفكر ف البضاعه
باختصار من غير ما نبعد
بص شوف لا البيعه تحمض
.......شاب يافع.....
شاب دارس
شاب واعى
علم فاهم
فكر جامع...
شاب يافع
الدراع قوه حصان
ف الشجاعه ماهوش جبان
كل شيء فيه من زمان
ينكتب عنه مراجع
.....شاب يافع
بس يمكن عيبه حاجه
حاجه واحده مش قضيه
يعنى مش مستاهله هيا
.....
هو حظه مش مثالى
... خرجوه قفلوا الوظايف
....الجواز مش مكتوباله
.... السكن ولا عاد ف باله
.... البلد مش شايفه منه
غير مورد للضرايب ....
طب منين والرزق غايب
او منين والحظ خايب
مش مهم ...
انت مكتوب فى الشهاده
مع الحكومه
برضه فاضل ليك شهاده
من الحكومه ....
مش مهم
.مين يتمن ؟؟
احنا بنبيع بالخساره
طب اقولك
بيع شطاره
تاخده راح ندفع فلوس
اكلوه ماتاكلوش..
عيشوه وسط البقر
احنا بنبيع بالخساره
بيعه لدواعى السفر....
حسن بعيله
ليست هناك تعليقات:
إرسال تعليق