وسبحت ف عينك الزرقا
وتهت ف جنة الأحلام
وحطيت خدي علي خدك
نعومة وعطر آه ياسلام
ف حضنك بانسي انا همي
وبانسي الدنيا والآلام
ف شط غرامك اتهني
وأتغني بأحلي كلام
وشفت البحر وبيضحك
بضحكة تروي قلبي ري
لنجمة عايمة ع الميه
بتهمس للعيون بالضي
وشفت البدر يتغزِّل
ف توبها إللي ماله زي
وطير للغصن بيبدِّل
يسبَّح ربه "الله حي "
ونسمة صيف وبتهفهف
يطير شعري وقلبي معاه
وصخرة من زمن واقفة
ومبتسمة ماتشكي الآه
يجيها الموج وباللهفة
بيحضنها وقلت " الله "
ياريت الفرقة ما تقرَّب
ويا محلي الحبيب ولقاه
وقلت أطوف وف دروبها
علي جبينها لقيت المجد
وناقشة كفوفها بالحنَّة
دي ولاّ بالريحان والورد
شطوطها عجيبة محلاها
جمالها والله زاد الحد
ياريت فيها أنا استني
دي جنة عشتها ع الأرض
وأندلسية ..دي فيينا
ف بلدي .. ولاّ دي جنة
يشوفها القلب يتهني
وفيها الطير بيتغني
ولون الميه فيروزي
تقول لعيونك استني
وإحلم بللا واتمني
وإيه دا يبعدك عنا
تشوف الحور تعوم فيها
وتحلف ما تجافيها
وتسكن فوق روابيها
جمال.. والسحر ماليها
يابخته اللي عاش فيها
ويسلم اللي بانيها
وتسلم عين محبيها
وكل اللي زرع فيها
وسبحانه اللي صورها
وأبدعها
وكل جميل حباها بيه
ومتَّعها
تنادي الناس ربيع أو صيف
تجمَّعها
وأصعب شيئ ماتيجي ف يوم
تودَّعها.
ليست هناك تعليقات:
إرسال تعليق