مين اللى شال يوم همنا
مين اللى حس يوم بجار
مين اللى شال يوم دمعنا
ليه بس بندوق المرار
نكتب كتير فوق الورق
نوصف بحنه والعيشه نار
عايش كأنى باتخنق
والمشنقه مافيهاش فرار
ثورات وقلنا تلمنا
ماهو شعبنا .. قام يوم وثار
لقيناها داست لحمنا
وحسينا فيها بانكسار
ارهاب بيقتل ف ابننا
وتفجير بيوحى بالدمار
كان نفسى نفرح كلنا
ونقوم بجد مش هزار
كان نفسى حلم يلمنا
ونشوف معاه نور النهار
لكنا زدنا ف غلبنا
الفقير يفضل فقير والغنى صاحب القرار
ليه بس ينزف جرحنا
والشوك بعتبة كل دار
فين الامل راح مننا
معقوله هيطول لنتظار
قلت اعيد تانى الورق
ملقيتش حرف الفكر طار
يوم بيوم انا باتحرق
والكل بيزود فى نار
وبرغم عايش فى القلق
شايف امل خلف الجدار
لو حتى كان بيتسرق
هارجع اجيبه ودا قرار
الظلم لو طال الليالى
بيتمحى بضؤ النهار
مد ايدك بالامل
تعالى نرفض الانكسار
تعالى بشوية عمل
ونوصل الليل بالنهار
تعالى نرسم حلمنا
وما يهمنا سد وجدار
---------
ليست هناك تعليقات:
إرسال تعليق