لسّه السما ...
ف عيوني زرقا مزهزهه
لسّه الحياه ...
أجمل كتير على كفّها
لسّه الورود ...
بتغنّي عطر ف حسنها
وكأنها ...
ياقلبي مزروعه لها
لسّاني بتحدّى الظروف
واكسر ستاير أي خوف
لسّاني مش قادر أشوف
غير بس ضحكة خدّها
طب أعمل ايه ف الحالة دي؟
دنا ف الحقيقه .. بحبها
لكني خايف م الزمن
خايف على حُبي الكبير
خايف غيام يحدف مطر
طير الغرام يعجز يطير
وان حتى طار خايف قوي
يرجعلي بجناحه الكسير
خايف عليكي يا ضحكتي
لتموتي قبل ما تبتدي
وساعتها تصبح دمعتي
هي اللي جوّه العين مصير
والوحده ترجع من جديد
تصاحبني تاني بعدها
طب أعمل ايه ف الحاله دي
دنا ف الحقيقه بحبها
يا بُكره ياللي جي هناك
هات السعاده مابين إيديك
دنا جوّه منّي فيه ملاك
بالحُب واقف بيناديك
واحنا ف دنيا المغرمين
إتنين ملايكه قُصاد عينيك
إبعت طيورك بالغُنا
والشمس تبقى حنيّنه
يا بُكره دا العاشق أنا
وأديني اهُه .. بترجّى فيك
وعشانها أعمل أي شئ
ممكن يفرّح قلبها
طب أعمل ايه ف الحاله دي
م انا ف الحقيقه .. بحبها
سيد منيرعطيه
من ديوان( كل الحروف انتي)
ليست هناك تعليقات:
إرسال تعليق