أغلى ناسي...هدير الجواهري أم تقي

چنت تسميني حبيبتي وأغلى ناسي...

وفجأة رحلت وسديت بوجهي الباب...

گلت ما يخالف چم يوم يرتاح ويرجع...

أحاول ألاگيلك عذر واخلق أسباب...

وكل يوم اتنطر واگولن باچر يجي...

بگلبي نار تچوي بين الحيرة والغياب...

ومرت هواي أيام وانت تدز كلماتك...

تجرحني بيهن وتشيلني هم وعذاب...

وما ادري شگولك أخافن تنجرح مني...

اسكت وأحاول ما أكتب اي جواب...

اشتاقيت الذيچ السوالف الحلوة...

من ما تلگاني ألاگي رسائل وعتاب...

تگولي وين أحباب گلبي ماكو اليوم...

وافرح من تسأل وتگولي أعز الأحباب... 

ليش تغيرت فجأة وبلايا ذنب مذكور...

صرت ترفض كل حچاية مني وكتاب...

ويزيد الجرح جرحين وباچر طول...

گلبي ما تغير هو ذاك بين ايديك ذاب...

ولا تعتقد فد يوم أگدر انسه سوالفنا...

درابين العشگ ما تنسه ولا نصير اغراب...

ولا تنسه چلمات طافت بين اثنين...

ولا تطيح الچلمة بين محبوبين بالتراب...

ابد ما تصير هاي يا ماي العين ولا تظن...

نسيانك يمشي بگليبي يا هوى الهاب... 

من بعدك كل شي علگم حتى الماي...

حتى الهوى العذيبي لا حله ولا طاب...

وإذا انت مرتاح هيچ مثل ما تگول...

مبروك اهنيك براحتك وآني بگلبي أنياب...

كل يوم تاخذ مني سنين وراحة عمر...

ولا تنسى وعدك يوم گتلك الحب سراب...

كتلي وياي لا تخافين أبد وبس الموت...

يفارگنا والموت بعده ما اجه للالباب...

ما عرفتك هيچ قاسي أبد ولا دريت...

دوم بسماي لازم تتعكر وينعگ الغراب...

عرفت راح تجي غيمة سوده تعكر حياتي...

بس ما توقعت منك الغيمة وجرح الحراب...

كلشي چنت متوقعة بحياتي بس فراگك...

لأنك نسمة عذيبي لگليبي والهوى الجلاب...

ومن گتلي أغير كل شي بحياتچ فرحت...

لأن ادري حبك غيرة وحرص مو شهاب...

ولا رقيب تخلي يمي وثقت بيه بلا رقابة...

گولي شغيرك يا بعدهم كلهم الأهل والغياب...

حبيت كل اللي تحبهم وسمعت أم كلثوم...

كتبت شعر الك وقريت نزار ومظفر النواب... 

حتى اقترب منك أكثر كل يوم ونتشارك...

كلماتنا سوه وياما كتبنا دون علم واقتراب...

لو نسيت حتى هاي وعايش براحة حلوة...

بلا حب ولا وجع راس ومغثة واكتئاب... 

يا ريت أگدر اسويها أو حتى أگولها مرة...

لا مستحيل احچيها واخلي لچمة وعتاب...

أخاف اعلى گلبك من نسمة عذبة تمر بي...

مو ألم وجروح حتى لو ضاع العمر والشباب...

كله فداك يا بعد الروح ولا يهم شي بعدك...

تعدي وياما دگت عالراس طبول ورباب...

ولو فد يوم سألوك عني گولهم مشى...

ما والمه الحب سلاني وعن الحب تاب...

..........................................................هدير