الحزن فيك يا وطن
يشبه نايات الليل
يعزف بصوت الشجن
يبكي السمك ف النيل
وانت اللي م المبتدا
عز الضلام قناديل
يحدف نخيلك رُطب
بحلاوة الترتيل
دلوقتي حتى النهار
متداري خلف غيوم
ليه يا وطن بتصوم
وتبل ريقك ويل ؟!
شايفك حزين يا وطن
وانت اللي كنت ضحوك
شايفك غريق ف المحن
ليه ف المعاصي رموك؟
مين اللي رسمك وجع ؟
مين اللي زرعك شوك ؟
مين داقوا شهدك زمن
بعد الزمن وباعوك ؟
دانت اللي شمسك دهب
وانت اللي قمرك علم
قوللي يا باني الهرم
مين اللي جُم هدموك ؟!
إمتى تعود بسمتك
تروي السنابل ضي ؟
واسمع نغم غنوتك
بتنادي بكره الجي
دانت اللي عز الوجع
ما نطقت كلمة أي
وانت اللي وقت العطش
ف الأرض معنى الري
وانت اللي وقت الحر
ع الترعه شجرة توت
لو حتى كُلُّه يموت
انت اللي تصبح حي
عايزك تعود يا وطن
صوت الأمين جبريل
وتشق بحر المحن
بعصاية التنزيل
يحضن أدانك جرس
بعد الشقا والتعب
يرجع نخيلك رُطب
بحلاوة الترتيل
سيد منيرعطيه
من ديوان (سرسوب نهار)
ليست هناك تعليقات:
إرسال تعليق