النهارده ياجوز بتاعك
يعني دوس على قلبي واجرح
يعني إدبح
يعني شوف الدم سايل
من وريد الحب وافرح
لف بالنصر المزيّف
كل حتّه وكل مطرح
بس لو بالفعل تسمح
عندي كلمه ح اقولها وامشي
خطوّه خطوّه لحال سبيلي
لو ح اقضّي العمر بعدك
بين دموع الشوق وويلي
لو ح اعيش العمر كُلُّه
جوّه توهه ف كهف ليلي
مش رح اقبل مهما يحصل
إنّك انت تكون دليلي
بعد بيعك ليّا شكرا
إنت حطّيت النهايه
م النهارده بجد فعلاً
إحنا ف ختام الروايه
بكره رح يصبح بتاعي
بكره ح اختار البدايه
ويّا قلب غرامه بِكر
جوّه حضنه الليل جناين
والورود بتشع فجر
قلب ما بيعرفش يخدع
أو يبيع
قلب ليّا وملكي وحدي
مش يكون ملك الجميع
وانت لمّا ف يوم تضيع
إوعى عقلك يوم يقولك
إنّي ح ارضى باعتذارك
واللا ح اقبل يوم رجوعك
مستحيل صدّقني مهما
جيتني متحمّي بدموعك
النهارده ياجوز ف طوعك
بس لمّا ح ييجي بكره
ح يبقى ليّا
واللي كان ف إيديك ضحيّه
مش ح يهدا إلا لمّا
من عينيك ..
ياخد بتاره
سيد منيرعطيه
من ديوان (باستغربك)
ليست هناك تعليقات:
إرسال تعليق