أباريق الحب ...إيزيس محمد غانم

لو تعرف...

واحمد ربى إنك مش عارف...

بإن العشق ف قلبى البحر..

وإنك بحرى لكن مش عارف..

وانا مش عارفه أبعتلك طيرى ..

وأرسملك على ريشه ضميرى...

لأنك قلبى وخطوة سيرى...

لو تعرف...!

لكن احسن إنك مش عارف...

إن العارف لو عارف...

إن القلب الرايد قلبة ..

بيخطى الخطوة ويرجع خايف...

عارف ليه خايف منك..؟

خايف لتكون انت الخايف..!!!!!

وساعتها هتبقى الصدمه كبيرة...

وقلبى هيبقى ما بين الشك وبين الغيرة

يعنى هدور ف رحاية الحيرة وهسأل نفسى...

يا ترى بيحب..؟

وللا بكارة قلبة الأخضر ...

لسه مابين الشوق والحيرة ..؟

فابدأ..لأنك إنت البدء الأول...

وانا من بدءك...

كنت الجزء التانى ف بدءك..

فلازم تبدأ...

وساعتها هامد إيديه إليك....

واشرب من أباريق الحب..

الفايضه بحبك ماليه عينيك...

أهلا بيك...

جيت من بعد ما قلبى إتوجّع...

بعد مادار ف مدارك ينده سيف الشوق..

ويحايلة عشان يغرز أشواقه..

تصحى النبض النايم فيك..!!!

أهلا بيك..

صفحة قلبى البيضا قصادك...

فاكتب بإيديك...

إنك بتموت فيا وسيبنى

أكتبلك على صفحة قلبك...

إنى بحبك وبموت فيك...

.......................................

من ديوانى الثانى ..

قصيدة أباريق الحب ...

‫#‏إيزيس‬ ‫#‏غانم‬