لا يوم ارهابكوا خوّفني
ولا رصاصكم ودينامتكم
ولا حتى قنابلكم
دنا طول التاريخ حافر
بقدمي هناك مقابركم
وانا لحظة ما ابُصلكم
هتبقوا لا شئ
دنا الجندي بقلب جرئ
أنام ف الطل ما يهمش
ورمل الصحرا ليّا صديق
بمصمص عضم مليون ديب
وع التعابين ببل الريق
حذاري تمُرّوا قُدّامي
حذاري .. لو جمعنا طريق
حذاري تبصّوا لبلادي
ولزهورها
هتلقوا م السما طيورها
بقت أبابيل
وتلقوا حجاره من سجّيل
بتخسفكم لسابع أرض
دنا واحد ف خير الجُند
وزيي راح تلاقوا ألوف
نصحّي الشمس من نومها
ونغزلها ف شال ملفوف
علم مصري
وانا بصري ..
يجيب النمله بالأميال
ولو هصرخ ف قلب الليل
حهد جبال
أصحي الموتى من نومهم
ولاد ورجال
أنا فوق الكتاف شايل
سلاح أبطال
أكون وقت الحروب زلزال
لكن وقت السلام أصبح
غناوي وترنيمات موال
ولسّه مازال
بمد إيديّا للعايز
وجايز .. لحظه أقبلكم
لكن لو دمّي سال منكم
سلامي يبقى ليكوا مُحال
هقول أسف ونفذ الصبر
ف أرضي رح تلاقوا القبر
ولو رح اموت ما تفرقشي
أموت لكن تعيشي يامصر
دنا الجندي
سيد منيرعطيه
من ديوان (منتهى اللذة)
ليست هناك تعليقات:
إرسال تعليق