أنا والليل طريق واحد
مالوش ف الزيف
أنا والليل حكاية شوق
حقيقه ما تحتمل تحريف
بنتقابل ..
على طرف الحياه ونعيش
بنتسامر
وبحكيله مدى شوقي
وليه الدم ف عروقي
بيندهلك
وليه فوق اللسان إسمك
ما فارقنيش
وبحكيله حاجات ياما
عن الحُب اللي كان بنّا
عن الجنّه
عن الضحكه اللي كانت نور
وبايته يا روحي ف عيونّا
عن الاحلام
عن التفاصيل
وعن قلبي اللي كان بيميل
على قلبك ف لمسة إيد
وبحكيله عن التنهيد
وعنك وانتي ويّايا
بنتمشّى ف كُل طريق
وصوتك اللي كنت عليه
ببل الريق
ونَفَسك لمّا كان يطلع
ويتوحّد مع نَفَسي
وعنّي يوم فُراق نفسي
ف لحظة لمّا سبتيني
واقوله ازاي بقيت بردان
ومين غيرها يدفّيني ؟
كأني ف الحياه ميّت
وصوت الذكرى يحييني
ف بحكيله عن الماضي
وانا خايف نهار بُكره
وبحكيله وانا ماسك
بكل كياني ف الذكرى
واقول يا ام العيون سمرا
وحشتيني
ومستنيكي يا حبيبتي
تجيني وتحيي تكويني
ونرجع تاني نتجمّع
أنا وانتي ..
ف حُضن الليل
سيد منيرعطيه
من ديوان (كل الحروف انتي)
ليست هناك تعليقات:
إرسال تعليق