خابت ظنوني...هدير الجواهري أم تقي

توقعت تسأل وتقلق على حالي...

وتگولي شلونچ وشصار ما صار...

وراحت ظنوني كلش بعيد وتوهمت... 

ولا همك اللي بينه وشنو اللي دار...

حرامات الگلب يهوى الما يهواه...

ويتأمل كل يوم وصلك ويحتار... 

شنو الغيرك بين يوم وليلة وصرت...

لا تسأل ولا تتفگدني بكل الأخبار...

ليش الگلب هيچ بساع يتلون ويتغير...

واللي تحبه يبني بينه وبينك أسوار...

ويوم بعد يوم المسافة تطول وتطول...

والشرخ يكبر وعريض هواي الجدار... 

وكل يوم الگلب بعده يتأمل ويسأل...

واگوله ماكو فايدة يا گلب طلع غدار...

بنيتلي قصور من الرمال وبلحظة... 

وگع كل اللي بنيته شيفيد الاعتذار...

أنفاسي تتگطع من كلشي ديصير...

والگلب من رحيلك بحالة احتضار...

لا تحچي ولا تعتذر ما يفيد الحچي...

لا يفيد السرد الطويل ولا الاختصار...

خلصت قصتنا بوقت قياسي والحب...

انتهى بلحظة وحده ودون سابق انذار...

راح أغادر گلبك وماعود أبد للمكان...

ماعاد الي مكان ولا وطن بهاي الديار... 

الأصيل بهالوكت ما يتقدر بثمن ونادر...

وانت بعت الذهب وساويته وية الدينار...

غايتك شنو وليش ما عندي اي تفسير...

متاكدة راح يجي يوم وينزاح الغبار...

وتطلع الحقيقة واضحة بلا غواش...

مثل الشمس تسطع للكل بوضح النهار... 

ما راح ادز مكاتيب ولا عتاب ولا حرف...

حتى النوارس ترفض رسائلي والحوار... 

ما تقبل توصل اي رسالة ولا مكتوب...

وتگولي كافي تتحججين بأسباب وأقدار...

اللي هجر ما يعود صحيح حقها النوارس...

ولو يريد يعود ما يحتاج أسباب وستار...

لو بعدچ متربعة وسط گلبه چان عاود...

وأكيد يعاود لو هزه الحنين والزمن دوار...

راح يجي يوم وترجع النفس المكان...

بس ما راح تلگه لا گلب حنين ولا أوتار...

راح تلگه أوراق الخريف وزمن ماضي...

لا ينفع بي نحيب ولا دمع يترس بحار...

.....................................................هدير