الشاعر/ ثروت سليم..معارضا لقصيدة الشاعرة المتألقة/ عبير الصلاحي.( عاوزة اوصفَك )

---------

أحدث قصيدة للشاعر / ثروت سليم بالعامية المصرية 

معارضا بها قصيدة الشاعرة الأميرة / عبير الصلاحي ( عاوزة اوصفَك )

**********

عاوز اوصفِك بكلام كتير 

والوصف مش زي العبير !!!

أوصف ايديكي بهمسة ..من لمس الحرير ؟

أوصف عنيكي برقة السِحر المسافر ..

قلبي جواهم سَفير ؟

ولا اوصف الشَعر اللي هفهف ع الخدود ..

يرجع يطير ؟

ولا اوصف الورد اللي خدك وشوشهُ ( أوعاكَ تغير ) ؟

ولا اوصف القد اللي بتمايل وقلبي معاه أسير ؟

طب هـوصف ايه؟ ولا اكتب ايه؟ 

والوصف من وصفك كبير !!!

عاوز أوصفك للناس بإحساس.. وبضمير 

صوتك.. ورقة همستك ..

تفرق كتير 

حُضنك ..دفاكِ ..وكل شيء !!! 

يَفرق كتير 

المسألة مش حَد جنبَكَ ع السرير 

المسألة روح جوه روح وابقى الأمير 

وانتِ اللي جوه القلب بسمع خطوتك..

همسة غَدير

والمسألة إن اللي عاوز يوصفك ..

عاشق خَطير 

والمسألة هي اني شاعر..

والشعور بتعب كتير 

والمسألة مش وصف بنت بحبها 

دا المسألة انك (عَبــيـر )

********

عاوز اوصفك إن الجمال ..

مش بنت حلوة مَقطقطة 

دا انا قلبي جوة عنيكي نام ..

من غير غََطا 

وصحيت بهمس الشوق وبسمع رقتك 

بتقوللي نام والقلب يديك العطا 

عاوز اوصفك إن الفؤاد مولود جديد ..

والوصف من غير لخبطة 

وان اللي بينا مهوش كلام 

والحب مش بالسفسطة 

يمكن أكون في الوصف خايب مش خبير 

والسهو وارد والخطا 

لكن وصفتك انك انتي..

أحلى حاجة في دنيتي 

والدنيا من غيرك 

بتبقى ملخبطة

****

بقلم : ثروت سليم

----------------------------------------------

وكانت الشاعرة المبدعة عبير الصلاحي قد كتبت : (عاوزة اوصفك ) فقالت:

--------------

عاوزة اوصفك للناس بحالها في كلمتين 2 وبس

انت اللي قبل هواك ما يجي عمر قلبي في يوم ما حس

وانت اللي بعد هواك ما فات علمتني 100الف درس

تسمح لي اني اوصفك وانا دايبة فيك؟!

انت؟!!.... انت اللي كنت انا عايشة بيك.

ماسكة في ايديك ومتبتة محمية فيك..

شايفة الحياة من نور عينيك..

ولا عمري مرة ظلمتني ولا فاكرة حتى قسيت عليك

...... انت؟!!.....

انت الهنا مسقي في كاسات

.حتى في كلامنا والسكات..

كم ألف نجمة جبتها لي من السما 

وغزلت بيها عقد لولي تلبسه ست البنات..

انت.؟!...

انت الحساب من غير عتاب.لدموع عيوني قفلت باب

.ولبسمتي فرشت سكة بالورود زينت لي صُفح الكتاب....

انت..؟!!..

انت اللي كل ما أقول راح انسى ..

واقلب الصفحة ببساطة واحذفك كده من حياتي.

القى كل الكون عاتبني حتى عمري وذكرياتي

كلهم رفضوا الغياب...

لكني مش هاقدر اسامح قسوتك..

وارجع اليك من غير حساب

.!!بعد قلبي ما فوته وحده يلفظه 100الف باب..

ده كل فرحة رسمها بيك دايبة في مرار الغياب..

اعذرني ما قدرت اوصفك..تاهت ملامحك م العذاب........

"عبـــير"