لما أحكي ..
أو ياخدني الشوق لضلّك
ألقى نفسي توهت منّي
توهت منِّك
توهت حتى عن حياتي
أنزوي وادخل ف ذاتي
بين جبال الروح أسافر
وامشي جوّه كهوف سنيني
لجل اشوفني ف أي حتّه
بس برضه مش لاقيني
كل صوره تشوفها عيني
فيها حاجه من ملامحي
فيها ليل يشبه لصبحي
فيها شكلي وفيها لوني
ألقى فيها حاجة تانيه
حاجة غيري
لسّه مش عارف مصيري
ح التقيني واللا لأه
لسّه جوّه القلب دقّه
واخده إيدي وماشيه بيّا
أعمى ف السكّه الطويله
واللا عين السكّه عاميه ؟
النتيجه هيّ هيّ
م الوقوع أنفض غباري
تستلمني حفره تانيه
لجل اكون واقع تمللي
مين بيشرب دمّي صودا ؟
مين بجرح الروح يحلّي ؟
مين دبحني وجه يصلّي
جنب نعشي بدون وضوء ؟
مين بيبعت ليلي لمّا
ف السما يظهر شروق
مين بيتعمّد يدوق
مين وريدي نقطه نقطه ؟
مين قاطعني ألف حتّه
فوق جبال الكون راميني
لجل اكون العمر كُلُّه
ماشي تايه مش لاقيني ؟
لو دا كُلُّه بإيدِك انتي
يبقى أحسن يا حبيبتي
تجمعيني وتصلبيني
حتى لو على جزع شجره
لجل اموت ..
باصص عليكي
سيد منيرعطيه
من ديوان (باستغربك)
ليست هناك تعليقات:
إرسال تعليق