لمّا تحس ..
إن مشاعرك فوق الحد
وانّك حد ما لوهش مثيل
وانّك قلب وله إنسان
مش إنسان له قلب جميل
وانّك شمس عيون الصبح
وانّك نجم ف قلب الليل
يبقى طبيعي تحس بوحده
لمّا تقابل قلب عليل
م انت طبيعتك غير العالم
حلمك مش لاقي التأويل
إنت بتشبه نهر النيل
لمّا يفيض فوق البساتين
إنت الحب ف شرعك دين
يعني عقيده
يعني إيمان
إنت مؤكد مش إنسان
إنت ملاك م الجنّه ونازل
واخد تصريح من رضوان
إنّك تيجي الأرض تعلّم
أهل الأرض إزاي يتعاملوا
ويّا معاني الشوق والحب
وان الحب إيمان بالرب
عمره ما كان حاجه استثناء
ولا أحبار فوق الأوراق
وان علاج تفاصيل الداء
لو تهتم بغيرك دايما
من غير خوف
تفتح باب الحب جناين
صيف أو شتا وف أي ظروف
داللي مشاعره مجرّد ورقه
أعمى بصيره وأعمى الشوف
واللي الحب ف قلبه حروف
يبقى مؤكد من غير قلب
إنت ملاك نازل بالحب
يبقى طبيعي تحس بوحده
لمّا تعيش ساعتين ع الأرض
لمّا تحس قلوب العالم
كل دقيقه تكون ف الضد
وان جبال الشوق ويّاهم
من أوّل مطره بتتهد
وانت لواحدك عايش بينهم
بس مشاعرك فوق الحد
يبقى مؤكد ..
إنت غريب
سيد منيرعطيه
من ديوان (باستغربك)
ليست هناك تعليقات:
إرسال تعليق